Ingó & Veðurguðirnir hafa sent frá sér sína fyrstu plötu, Góðar stundir.
Platan inniheldur alla smellina sem hljómsveitin hefur sent frá sér undanfarin misseri; Bahama, Drífa, Vinurinn, Nóttin er liðin ásamt laginu Undir regnbogann, sem Ingó flutti í forkeppni Eurovision og lenti í öðru sæti. Þá eru fjölmörg ný lög á plötunni og allir textarnir ásamt gítargripum fylgja með í bæklingnum.

Sagan.
Veðurguðirnir byrjuðu sem brandari þegar að þrír ungir menn ákváðu að hittast í bílskúr í Biskupstungum borða piparkökur og spila lög með hljómsveitinni SSSól. Strákarnir hittust einu sinni í viku í mesta lagi og óhætt er að segja að tónlistarlegur metnaður hafi sjaldnast verið í hávegum hafður. Þrátt fyrir það létu piltarnir ekkert aftra sér frá því að bóka fyrsta giggið en sú ákvörðun var tekin að spila á Pakkhúsinu, Selfossi, fimmtudagskvöld í byrjun janúar. Ekki var lagalistinn þykkur og segir sagan að lög eins og Bítlalagið Don't let me down og SSSól ballaðan Síðan hittumst við aftur á miðri leið hafi fengið að hljóma þrisvar sinnum á þessu 90 mínútna setti. Jafnframt vöktu glöggir áheyrendur athygli á því að yfirleitt söng hljómsveitin bara viðlögin. Ævintýrið vatt hinsvegar uppá sig og í dag spila Veðurguðirnir úti um allar trissur og er lagalistinn orðinn ögn markvissari. Bandið samanstendur af Magnúsi Guðmundssyni Viðskiptafræðingi, Eyþóri Loftssyni Rafvirkja, hljóðmanni og þúsund þjala smið, Valgeiri Þorsteinssyni trommara, smið og rútubílstjóra og Ingólfi Þórarinssyni Stjórnmálafræðinema og skemmtikrafti.